قصيدة بحق السيده شريفه بنت الحسن عليها الصلاة والسلام

الخميس فبراير 12, 2015 11:06 am

يا شريفه ياشريفه

انت باب الله الوسيع

الدخل يمج مايضيع

ياشريفه ياشريفه
ــــــــــــــــــــــــــــــــــــــــ ــــــ
نعم يابنت الاكابر

اسمج بعالي السمه

منزله عندج ام هادي

غصن شجرة فاطمه

بيج يتشافه المريض

وتنفرج كل معضله

انت بنت الحسن نورج

بالكتاب الله أنزله

انت قران الجليل

وبيج يتشافه العليل

ياشريفه ياشريفه
ــــــــــــــــــــــــــــــــــــــــ ــــــ
يابنت احمد الهادي

بنت أمير المؤمنين

للكصد يمج يزورج

بعد الله انت المعين

مراد من عندج ينوله

بفضل رب العالمين

والشفيعه انت ياحره

وهذا نبهارج مبين

انت للحاير دليل

وابد ماعندي بديل

ياشريفه ياشريفه
ــــــــــــــــــــــــــــــــــــــــ ــــــ
بعد مايحتاج اسال

انتو اسياد الزمان

واسم انت على المسمى

ياشريفه انتو الامان

والي جادلني ويحاجج

عندي برهان وبيان

انتو باب الله الواسع

انتو انوار الجنان

العاش وياكم سعيد

وانتو تنطونه شيريد

ياشريفه ياشريفه
ــــــــــــــــــــــــــــــــــــــــ ــــــ
ياللي برهانج مجرب

واليشك ماعنده دين

انت ابوج الحسن يكرم

والكرم من الحسين

نعم يابنت المثنى

والدي نسل الامين

والكرم منج ام هادي

اجيال تشهد والسنين

انت طب للمستحيل

وانه يم بابج دخيل

يا شريفه ياشريفه
ــــــــــــــــــــــــــــــــــــــــ ــــــ
شلون اكدر انه اختم

بحقج وهذا قليل

والقوافي بخجل تحجي

وحق سجاد العليل

القصيده دموع تذرف

ياحجاب المتقين

زيد يشهد ياشريفه

بهذا واهله الطاهرين

بالقصيده ارجو القبول

منج ومن البتول

ياشريفه ياشريفه

بقلم الشاعر الحسيني حسن نايف سعود الخفاجي ابو مؤمل